Bewerings van wraak is ‘bloot praatjies’

Verslaggewer – Ilse Krige

HERMANUS – Die moordtoneel waar ‘n jong man van die dorp glo voor sy vriende doodgeskiet is en hoorsê-dreigemente van wraak deur AWB-lede, het in die borgtogaansoek hier van ‘n oudonderwyser en oud-Springbokatleet ter sprake gekom. Mnr. Hendrik van Zyl Kriel (51), vermeende moordenaar van mnr. George Clarkson (21), sal eers Maandag hoor of sy borgtogaansoek toegestaan word. Kriel het Clarkson na bewering op 3 Desember in die kop geskiet en die jong man se drie gaste met onder meer ‘n bofbalkolf, ‘ n dolk of swaard en ‘n haelgeweer aangehou en aangeval. Hy is sedertdien verhoorafwagtend op onder meer ‘n aanklag van moord en drie aanklagte van aanranding. Konst. Jonwin Smith, die ondersoekbeampte, het gister in die Hermanus-landdroshof gesê dit was ‘n vooraf beplande aanval. “Die beskuldigde het benewens die wapens ook ‘n sespak bier, ‘n bottel rooiwyn, kleefband en kabelbande in sy sak gehad.” Smith het beskryf hoe Clarkson eers in die gesig geslaan is en dat Kriel hom daarna met ‘n 6.35-pistool in die kop geskiet het. Volgens Smith vrees die getuies vir hul lewe en het van hulle al uit die dorp gevlug na die voorval. Hy het getuig mnr. Clifford Clarkson, die slagoffer se pa, het teenoor hom beweer van sy vriende is AWB-lede. Hulle het glo gedreig om Kriel “uit te haal” as hy borgtog sou kry. Mnr. Ben Mathewson, vir die verdediging, het gesê die AWB-dreigemente is “bloot praatjies”. Hy het gesê Kriel se reg op ‘n billike verhoor sal in die gedrang kom as hy nie borgtog kry nie, omdat hy doktersondersoek nodig het. “My kliënt het dreigemente van vergiftiging van sy voormalige vriendin (ook een van die ooggetuies) voor die voorval ontvang. Dokterverslae toon sover dat hy wel gif ingekry het,” aldus Mathewson.

Najwa probeer glo spore doodvee – sy wis nommer van selfoon uit

Die Burger

Verslaggewer: Carryn-Ann Nel

KAAPSTAD – Mev. Najwa Petersen het vermoedelik haar spore probeer doodvee toe sy die nommer van mnr. Fahiem Hendricks – die man wat sy glo vir die moord op haar man, Taliep, gehuur het – op haar selfoon uitgewis het kort voordat die polise die foon wou ontleed. Supt. Piet Viljoen, bevelvoerder van die eenheid teen georganiseerde misdaad, het gister in die hooggeregshof hier getuig mev. Petersen gemaak het. Hy het ook met behulp van ‘n spesiale rekenaarprogram alle inligting op die foon na ‘n rekenaar oorgedra. “Ek het in ‘n latere stadium – toe ek na die gedetaileerde selfoonrekening gekyk het – gesien daar verskyn ‘n nommer wat die aand van die moord tien keer gebel is, wat nie op die telefoon se uitgaande oproeplys was (wat ek neergeskryf het) nie. “Ek het die afleiding gemaak dat sy die nommer uitgewis het. Ek het gesien dit is as ‘Fahiem Piele’ op haar selfoon gestoor.” Die hof het voorheen getuienis gehoor dat dit Hendricks se benaam is. “Ek het dadelik vir die ondersoekspan gesê hulle moet uitvind wie Fahiem Piele is. Ek het ‘n gevoel gehad hy weet dalk wat gebeur het. “Ek het ook vir hulle gesê hulle moet dieper na mev. Petersen kyk as ‘n verdagte.” Die hof het gehoor hendricks se nommer – wat tientalle kere voor die moord gebel is – het die polisie “op die spoor” van Hendricks geplaas. Viljoen het vroeër getuig hoe hy die oggend van 17 Desember by die morodhuis opgedaag het. Hy het mev. Petersen gevra wat gebeur het. Sy het gesê hulle is beroof en het Viljoen na die kluis geneem. Volgens Viljoen het hy toe reeds onraad vermoed weens die waardevolle items wat nog in die kluis was. Dit sluit juweliersware, ‘n handrekenaar, sonbrille, muntstukke en note in. “Geen huisrower sal daardie items in die huis los nie,” het hy gesê. Adv. Klaus von Lieres und Wilkau SC, vir mev. Petersen, het dit aan Viljoen gestel dat hy oor mev. petersen bespiegel. Kapt. Kenneth Speed, wat aanvanklik ook lid van die ondersoekspan was, het getuig oor die aantal oproepe wat mev. petersen na hendricks se nommer gemaak het. Volgens die selfoonrekening het sy Hendricks op 13 Desember sewe keer gebel. Op 14 Desember het sy hom 26 keer gebel, die dag daarna het sy vier oproepe na die nommer gemaak, en tien op die dag van die moord. “Het u haar gevra waaroor hulle in kontak was?” wou Von Lieres und Wilkau by Speed weet. Speed het geantwoord hy het mev. Petersen gevra. “Sy het eers gesê sy en hendricks was in ‘n diamant-transaksie betrokke. Sy het egter die storie verander en gesê hulle was in ‘n verhouding.”

TALIEP SE VROU ‘HET OOK GELD VIR PRODUKSIES VOORGESKIET’

KAAPSTAD – Mev. Najwa Petersen het by drie geleenthede geld vir musiekproduksies van haar man, Taliep, en sy vennoot David Kramer voorgeskiet. Kramer, self ‘n musiek- en teaterlegende, het gister so in sy vriend se moorverhoor getuig. Kramer het gisteroggend aan regter Siraj Desai vertel van die vriendskap tussen hom en Taliep. “Ek het hom 30 jaar geken. Ons het 20 jaar saam aan musiekblyspele gewerk,” het Kramer, sonder sy kenmerkende hoed op sy kop, aan die hof vertel. Volgens hom was Taliep Petersen ‘n baie private mens. “Dis hoe ek hom geken het. Jy kon nie net na sy studio gaan sonder om ‘n afspraak te maak nie. As ek hom gebel het, het iemand anders ook altyd die telefoon geantwoord en moes ek vra om met hom te praat.” Hy het aan die hof verduidelik hy, sy vrou (Renaye) en Petersen het geld in die produksies belê. “Daar was ‘n ooreenkoms waar ons geld vooraf sou inbetaal. Sodra ons ‘n wins gemaak het, sou ons dit verdeel,” het hy gesê. In 2003 het Taliep hom gevra om die tjeks aan Dirk Fruit (mev. Petersen se familie-onderneming) en aan mev. Petersen self uit te maak. Die hof het gehoor mev. Petersen het by drie geleenthede geld voorgeskiet. Sy het geld beskikbaar gestel sodat dit soos ‘n “lening” aan die produksies gemaak is.

Skiet! Smeek Najwa glo

Die Burger

Verslaggewer: Carryn-Ann Nel

BESKULDIGDE WYS VINGER NA TALIEP SE WEDUWEE

KAAPSTAD – Enkele minute nadat Taliep Petersen sy laaste gebedskreet, “Allah al Akbar” (God is groot), geuiter het, het ‘n smekende mev. Najwa Petersen by een van die aanvallers daarop aangedring dat hy nog dieselfde aan geskiet word. Die bewering, in ‘n verlaring van een van haar medebeskuldigdes, mnr. Jefferson Snyders, het gister skokgolwe deur die hooggeregshof hier gestuur nadat ‘n staatsaanklaer dit voorgelees het. Snyders het vroeër vandeesweek aangevoer hy is deur die polisie beinvloed om hierdie verklaring af te lê. Gister het Snyders se regsverteenwoordiger, adv. Roelf Konstabel, egter aan regter Siraj Desai gesê sy kliënt plaas nie meer die toelaatbaarheid van sy verklaring in geskil nie. Die verklaring is daarna as ‘n bewysstuk ingedien. Petersen en haar medebeskuldigdes ontken skuld op aanklag van die moord op Taliep. Luidens die verklaring het mnr. Walleed Hassen, een van die beskuldigdes, die aand van 16 Desember net aan Snyders gesê: “Man, ons het ‘n job.” Die hek sowel as die voordeur van die Petersen-woning het oopgestaan toe die twee daar aankom. Taliep het “half skuins agteroor gelê en televisie kyk” toe Snyders by die trappe opgegaan het. “Hy (Taliep) wou hardloop, maar toe keer ek hom. Ek het hom beveel om stil te bly en vir hom gesê ons kom maar net ‘n robbery doen.” Luidens sy verklaring het mev. Petersen op hierdie oomblik in die voorkamer ingekom, waar Snyders haar wou vasbind, maar toe net geklap het. Een van die ander mans het na bewering aan hom gesê: “Nie sy nie, dis die persoon wat die inligting van die huis gegee het.” Die verklaring lui verder: “Sy (Petersen) en Walleed het na ‘n ander deel van die huis gegaan. Terwyl ek daar by Taliep gesit het, het ek hom herken en ek het nog my woord daardie aan vir hom gegee dat daar niks daardie aand met hom sal gebeur nie. Ek het die erns op sy gesig gesien en hy het begin bid. “Sy woorde was ‘Allah al Akbar’. Ek het besef dat hy weet dat hy vanaand doodgaan, dis hoekom hy vrede gemaak het met sy God en sy God genader het.” Volgens Snyders het “die vrou” half smekend gesê: “Hy moet vanaand geskiet word.” Sy het herhaaldelik gesê “hy moet geskiet word”. “Taliep het daar gelê en na my gekyk asof ek my woorde teenoor hom teruggetrek het. Ek is by die stairs af, na die bakkie toe en boem! toe hoor ek ‘n skoot. “Ek weet nie wie hom daardie aand geskiet het nie.” Snyders sê hy en Hassen het nooit bespreek wat daardie aand gebeur het nie. “Ek is vandag bly dat ek my gedagtes kon clear met die gereg en ek weet dat baie mense wat gebid het, se gebede beantwoord is.” Konstabel, sy regsverteenwoordeiger, het na die tyd aan Die Burger gesê hy kan nie redes gee waarom sy kliënt sy besluit verander het nie.