Najwa: Staat se laaste kans

KAAP RAPPORT

Verslaggewer: Estelle Ellis

STAAT BETOOG MôRE WAAROM TALIEP PETERSEN SE WEDUWEE NOOIT MOET LOSKOM NIE

KAAPSTAD – Die woord van drie teen twee word van môre af opgeweeg in die laaste hoofstuk van die uitgerekte Taliep Petersen-moordverhoor. Die getuienis van Waheed Hassen, Jefferson Snyders en Fahiem Hendricks gaan in die slotbetoë van die staat aangevoer word as die mees oortuigende bewyse dat Najwa Petersen die baasbrein agter die koelbloedige moord op haar man, die teaterlegende Taliep Petersen, was. Najwa en haar ander medebeskuldigde, Abdoer Raasiet Emjedi, se regspanne gaan egter in hul slotbetoë probeer aanvoer hulle was die onskuldige slagoffers van ‘n duistere komplot oor diamante en swartmarkdollars wat sleg skeefgeloop het. Die verhoor, wat in party kringe as “Bo-Kaap Isidingo” beskryf is, hervat weer môre in hof 1 van die Kaapse hooggeregshof. Shireen Riley, leier van die staat se regspan, sal met haar slotbetoog begin. Regter Siraj Desai en sy twee assessore sal moet oorweeg wie reg is: die drie mans wat haar uitgewys het as die baasbrein of haar getuienis en die van Emjedi wat meestal deur twee frases gekenmerk is: “Ek weet nie” en “Ek kan nie onthou nie.” Die staat sal vra dat Najwa skuldig bevind word op aanklagte van moord met voorbedagte rade – ‘n misdaad waarvoor sy lewenslank tronk toe kan gaan. Najwa se prokureur, mnr. Reaz Khan, het bevestig dat slotbetoë môre sal begin. Gewone mense het reeds Vrydag by die hof kom navraag doen oor wannneer die verhoor voortgaan. Toue mense het in die loop van die saak voor die hof saamgedrom in die hoop om ‘n plek op die openbare galery te kry. Hassen en Snyders het hul onderskeie aandele in die aanval op die Petersen-woning op 16 Desember 2006 erken in dramatiese getuienis. Hassen het erken dat hy die vuurwapen waarmee Taliep geskiet is in die huis ingebring het. Hy het dit egter duidelik aan die hof gemaak dat hy van plan verander het en nie meer vir Taliep wou skiet nie. Hy beweer hy was besig om vir Najwa te wys hoe om self die sneller te trek toe die doodskoot afgegaan het. Snyders het getuig hy het net saam met Hassen gery. Daar is vir hom gesê mense het gevra dat hulle beroof word sodat hul versekeringsmaatskappy hulle kan uitbetaal. Hul getuienis is grotendeels bevestig deur die staat se hoofgetuie, mnr. Faheem Hendricks, vir wie Najwa na bewering gevra het om vir haar iemand op te spoor wat gewillig is om haar man vir geld te vermoor. Hendricks wou, volgens sy eie getuienis, eers niks met die saak te doen hê nie, maar het getuig Najwa het so aangehou dat hy later vir Emjedi gevra het om iets te doen, net om van haar ontslae te raak. Dit was Hendricks wat, nadat maande se ondersoek nie veel opgelewer het nie, aan die polisie gaan vertel het wat gebeur het. Emjedi het ontken dat hy enigiets van die voorval weet. Hy beweer Hendricks het hom valslik betrek. Najwa se advokaat, adv. Johan Engelbrecht SC, sal egter ook moet kom verduidelik: * Hoekom die ontleding van die beskuldigdes se selfone Hendricks se getuienis staaf oor hul bewegings die paar dae voor die moord en die oproepe van Najwa. * Of die hoeveelheid en soort medikasie wat Najwa die aand van die moord gedrink het dalk die rede vir haar ontwykende getuienis en vergeetagtigheid kan wees. * Of Najwa rêrig beter af sou gewees het as Taliep van haar geskei het eerder as dat hy dood is.

Getuie betrek Najwa glo valslik

Die Burger

Verslaggewer: Carryn-Ann Nel

Hassen pas sy weergawe aan, hou haar advokaat vol

Kaapstad – Die selferkende fluitjieblaser in die Taliep Petersen-moordsaak “probeer sy bes om mev. Najwa Petersen valslik te inkrimineer”. Die opmerking van Petersen se regsverteenwoordiger aan mnr. Waheed Hassen (35) het gister ‘n beroering onder hofgangers veroorsaak. Dit was Hassen se tweede dag in die getuiebank. Regter Siraj Desai se geduld is telkemale beproef deur die talle hofgangers wat Hassen se opmerkings oor Petersen hardop beaam het. Desai is later genoop om hulle te waarsku dat hy die hof sal leegmaak. Hassen, wat beweer Taliep is deur Petersen self geskiet, het ten sterkste ontken dat hy Petersen op ‘n valse manier betrek. “Waarom sal ek ‘n persoon inkrimineer wat ek nie ken nie?” Adv. Johan Engelbrecht SC, wat Hassen heeldag onder kruisverhoor geneem het, het Hassen herhaaldelik gevra oor weergawes in sy verklarings wat verskil van sy getuienis nou in die hof. Die staat voer aan Petersen het mnr. Fahiem Hendricks gevra om die moord vir R100000 te beplan. Hendricks het vir mnr. Abdoer Emjedi gewerf, wat op sy beurt vir Hassen en mnr. Jefferson Snyders gekry het. “U is besig om u weergawe aan te pas,” het Engelbrecht by meer as een geleentheid gesê. Die betrokke bewerings gaan oor onder meer presies waar Snyders in die huis was toe Hassen ‘n kussing gaan haal het, die datum van sy eerste oproep aan Hendricks en hoeveel drade om Taliep se hande gedraai is. Hassen het gesê dit was vir hom “onwerklik” dat ‘n vrou by die dood van haar eie man betrokke was. Hierop het Engelbrecht geantwoord: “Presies, want ek wil dit aan u stel: Sy was nie”. Hassen het hierop geantwoord: “Sy was 100% betrokke.” Hy het ook getuig Taliep het “definitief” vir Petersen die aand van die roof met sy kop gestamp. ‘n Ontstelde Hassen het met sy wysvinger uitgestrek na Petersen in die beskuldigdebank gesê: “En beskuldigde een weet dit.” Die hof het ook getuienis gehoor dat daar moontlik na die tyd met die misdaadtoneel gepeuter is. Vrae het gister gedraai om ‘n kussing wat glo in die skietery gebruik is, asook ‘n lap wat in Taliep se mond gedruk is. Hassen het gesê hy “wil ook weet” wat van die veelbesproke kussing geword het, sowel as die lap. “Daar was geen lap in sy mond (toe ons daar weg is nie).” Hy het Petersen daarvan verdink dat sy self die lap in Taliep se mond gedruk het, maar toegegee dat dit slegs bespiegeling is.

Omkoopbewerings. ‘R250000 om Najwa los te praat’

Die Burger

Verslaggewer: Carryn-Ann Nel

Hassen wys hof hoe Petersen musieklegende glo geskiet het

Kaapstad – Mev. Najwa Petersen het onlangs nog by ‘n medebeskuldigde in die moord op haar man, Taliep Petersen, gepleit om haar “uit die saak te kry”. Sy sal na hom omsien, is belowe. Die beskuldigde, mnr. Waheed Hassen (35), het gister met die onthulling tydens sy getuienis skokgolwe deur hof 1 van die Kaapse hooggeregshof gestuur. Hassen het getuig hy is by drie geleenthede deur Petersen en haar familielede gevra om haar “uit die saak te praat”. Volgens hom het Petersen sedert hul eerste verskynings in die landdroshof “met (haar) taktiek begin”. ‘n Gevangene by die Wynberghof het na hom gekom en gesê hy moet “die vrou laat gaan; sy sal jou uitsort”. By ‘n ander geleentheid is mnr. Sedick Kriel (die man by wie Hassen na bewering die moordwapen geleen het) deur mnre. Whaleed Dirk en Waleed Ajou, (haar broer en ‘n familievertroueling) gevra of daar nie ‘n manier is om haar uit die saak te praat nie. ‘n Bedrag van R250000 is glo aangebied. Op 24 Maart vanjaar het Petersen in die hofselle by die hooggeregshof hom glo weer probeer oorreed. “Sy het gesê sy sal kyk agter my. Ek het vir haar gesê sy is ‘n grootmens. Dis net Allah wat kyk agter ons mense.” Volgens hom het hy dit by die polisie aangemeld. Hy, Petersen en mnre. Abdoer Emjedi en Jefferson Snyders ontken skuld. Die staat voer aan Petersen het mnr. Fahiem Hendricks (nou ‘n staatsgetuie) gevra om die moord vir R100000 te beplan. Volgens Hassen het Hendricks aan hom gesê ‘n “ou vriendin” het probleme met haar man, wat haar verneuk en haar slaan. Op die dag van die moord was die hek en die voordeur op ‘n skrefie oopgelos. Hassen en Snyders het by die woning ingegaan, waat Taliep televisie gekyk het. Petersen het later by hom ingehaak en gesê: “Kom, julle moet klaarmaak; julle moet hom skiet.” In nog opspraakwekkende getuienis was hofgangers vasgenael deur Hassen se demonstrasie van hoe die skietery plaasgevind het. Met ‘n kussing, ‘n leë vuurwapen en die hofbode (wat Petersen vertolk het), het Hassen gewys hoe Petersen die sneller getrek het. Hassen het egter volgehou dit was nooit sy plan om iemand die aand te vermoor nie, slegs om die huis te beroof en die oorledene ‘n “goeie pak slae te gee”. Kruisondervraging sal vandag begin.

Najwa trap klei oor geld

Die Burger

Verslaggewer: Carryn-Ann Nel

David Kramer betaal haar R300000 kort voor moord

Kaapstad – Die weduwee van die vermoorde Taliep Petersen kan nie verduidelik wat van byna R300000 geword het wat die sanger David Kramer kort voor die moord aan haar betaal het nie. Hofgangers in hof 1 in die Kaapse hooggeregshof het gister herhaaldelik in ongeloof gesug terwyl die staat getuienis gelei het oor die spoor van Taliep se geld. Mev. Najwa Petersen, Taliep se weduwee, het vroeër vandeesweek getuig dat hy “niks” ten tyde van sy dood besit het nie. Mev. Petersen en drie mede-beskuldigdes staan tereg op aanklag van die moord op Taliep Petersen in Desember 2006. Gister het die staat, wat mev. Petersen ‘n tweede dag kruisondervra het, aan haar gevra wat van Taliep se geld geword het. Die staat voer aan Taliep se geldbelange dra by tot die motief vir die moord. Mev. Petersen het getuig dat sy nie seker is wat van Taliep se geld geword het nie, maar dat die meeste van sy geld in haar familie-onderneming, Dirk Fruit, gestort is. Taliep het van die geld gebruik om Amerikaanse dollars te koop, wat hy dan later weer op die swartmark sou verkoop, het sy getuig. Met sy ander geld het hy onder meer betrokke geraak by sake-transaksies waarvan die meeste skeefgeloop het. Die egpaar se sjegs het van die transaksies geweet, het Mev. Petersen getuig. Op die vraag van adv. Shareen Riley, vir die staat, wat geword het van R280000 wat Kramer in Oktober 2006 in mev. Petersen se Namibiese bankrekening inbetaal het, het sy geantwoord: “Ek is nie seker aan wie ek die tjeks uitgeskryf het nie.” Kramer het vroeër getuig dat mev. Petersen geld vir musiek-produksies aan hom en Taliep sou voorskiet, en dat dit dan later as lenings terugbetaal sou word. Riley het aan mev. Petersen gesê daar was in Junie 2007 ‘n saldo van R43 in die rekening. “Wat het van die geld geword?” wou Riley weet. Mev. Petersen het geantwoord dat haar broers meer sou weet. Op ‘n vraag van die staat wat sou gebeur het indien die Petersens sou skei, het sy gesê Taliep sou geregtig wees op 50% van haar inkomste. “Taliep sou nooit die drie huise (van my familie) gevat het nie. Hy het geweet dit was in my naam. Hoewel hy daarop geregtig sou wees, weet ek hy sou dit nooit gevat het nie.” Riley het gevra of ‘n egskeiding nie ‘n verwoestende effek op haar familie-onderneming sou gehad het nie – indine Taliep op sy 50% aanspraak sou maak. Mev. Petersen het dit ontken. Sy het getuig sy “weet nie” waarom sy vroeër die indruk aan die hof wou skep dat Taliep by diamanttransaksies en die verkoop van Amerikaanse dollars betrokke was nie. Riley het gesê die indruk is in die tweede borgtogaansoek geskep dat Taliep by diamant- en slinkse transaksies betrokke was en dat hy mnr. Fahiem Hendricks geken het. Die staat voer aan Hendricks het die moord beplan. Mev. Petersen het vroeër getuig dat sy hom betaal het vir diamante wat hy namens haar moes verkoop. Petersen het gesê sy het na haar inhegtenisneming begin vermoed dat Hendricks agter haar man se moord is. Volgens haar wou hy $300000 (meer as R2 miljoen) steel wat in ‘n kluis van die huis was. Vroeër gisteroggend het mev. Petersen getuig oor die verklaring wat sy op 18 Desember 2006 aan die ondersoekbeampte, kapt. Joe Dryden, gemaak het. Volgens die aanvanklike verklaring het sy die doodskoot gehoor nadat sy met Taliep se suster oor die foon gepraat het. Sy het gister gesê dit was nie die geval nie en dat die skoot tydens die oproep afgegaan het. Die verhoor is tot Maandag uitgestel.

Najwa ‘het moordmotief gehad’

Die Burger

Verslaggewer: Carryn-Ann Nel

Advokate konfronteer weduwee in ondervraging

Kaapstad – Mev. Najwa Petersen het ‘n motief gehad om ontslae te raak van haar man, Taliep. So het adv. Roelf Konstable, regsverteenwoordiger van een van die vermeende huurmoordenaars, dit gister aan Petersen gestel. Sy is gister in die hooggeregshof hier kruisondervra deur die regsverteenwoordigers van twee van haar medebeskuldigdes. Mnre. Waheed Hassen en jefferson Snyders het by monde van hul regsverteenwoordigers erken hulle was die aand by die huis waar Taliep vermoor is, maar hulle ontken die doodskoot is deur een van hulle afgevuur. Konstabel het aan Petersen gesê sy het haar man in die verlede met ‘n mes in sy nek gesteek en genoem dat Taliep veroorsaak het dat sy R4miljoen verloor het. “U het al die redes gehad (om hom dood te maak).” Volgens Petersen het Taliep voor sy dood “geld gemaak” en was die kwessie van die R4miljoen iets wat “jare gelede” gebeur het. Konstabel het gesê: “Dit is my instruksies van my kliënt (Snyders) dat u die twee beskuldigdes gehelp het om vir Taliep vas te maak. U het herhaaldelik aan Hassen gevra wanneer hulle gaan klaarmaak met Taliep.” Petersen het dit ontken. Volgens Konstable sou Snyders glo gesê het hy het nie die aand gekom “om iemand klaar te maak nie”. Snyders het glo aan Hassen gesê: “F-k die job. Los die vrou, jy kan mos sien die mense het probleme.” Konstabel het aan Petersen gesê sy het vroeër getuig dat daar geen kwade gevoelens tussen haar en Snyders bestaan nie. “Waarom sou hy die dinge opmaak?” wou Konstabel weet. “Ek het geen idee nie,” het Petersen geantwoord. Adv. Patrick Scott, vir Hassen, het dit aan Petersen gestel dat sy en Hassen alleen in die vertrek was nadat Snyders weg is. “Hassen het aan u gesê hy is nie bereid om voort te gaan nie. “U is inderdaad die persoon wat die vuurwapen gevat en die sneller getrek het.” Petersen het dit ontken.

Najwa oor doodskoot

Die Burger

Verslaggewer: Carryn-Ann Nel

Weduwee getuig sy het niks met aanval op Taliep te doen gehad

Kaapstad – Mev. Najwa Petersen het haar man liefdevol omhels voordat sy van hom weggelei is en toegesluit is in hul hoofslaapkamer, van waar sy die “doodskoot” hoor afgaan het. ‘n Selfversekerde Petersen het gister op die tweede dag van haar getuienis in die hooggeregshof hier verduidelikings gehad vir die “kruks van die staat se saak”. Sy het gister ten sterkste ontken dat sy enigiets met die moord op haar man, Taliep, te doen gehad het. Die byna 100 hofgangers in hof 1 het doodstil geluister na haar weergawe van die gebeure op die aand van 16 Desember 2006. Sy het getuig hoe sy wakker gemaak en gewing is om vir die rower “met die balaklawa” geld uit die kluis te haal. Die hof het gehoor daar was “tussen R40000 en R50000″ en $300000. Onderweg na ‘n ander vertrek het sy vir Taliep op sy knieë in die sitkamer gesien en by die rowers gepleit om hom nie te beseer nie. Sy is later in die hoofslaapkamer toegesluit en het die skoot hoor afgaan. Gebeure daarna was vir haar vaag, het sy getuig. Petersen het kalm ontken dat sy huurmoordenaars gekry het om Taliep te laat vermoor of dat sy enigiemand vir die doel betaal het. Sy het “nee” geantwoord toe haar regsverteenwoordiger, adv. Johann Engelbrecht SC, haar gevra het of sy met mnr. Fahiem Hendricks saamgesweer het om Taliep te vermoor. Die staat voer aan sy het Hendricks R100000 betaal om die moord te laat pleeg. Petersen het ook ‘n verduideliking gehad vir die tjek vir R100000 wat sy enkele dae na die moord laat wissel het. Haar oorlede pa, mnr. Suleiman Dirk, wou die geld leen omdat hy namens hul familieonderneming, Dirk Fruit, voertuie gekoop en verkoop het. Sy het getuig sy het teenoor die polisie haar storie verander oor haar verhouding met Hendricks. Sy het Maandag getuig sy en Hendricks was dae voor die moord baie in verbinding omdat sy hom diamante van R250000 gegee het om te verkoop. Sy het egter in polisie-ondervraging met hom “saamgestem” dat hulle twee in ‘n verhouding was (wat volgens haar nie die waarheid is nie). Sy het gister gesê die rede hiervoor was dat sy onder die indruk was dat ‘n mens ‘n lisensie moes hê om diamante te verkoop. “En ek het nie een gehad nie.”

‘Taliep had niks’

Die Burger

Verslaggewer: Carryn-Ann Nel

Najwa sê sy het R4m. aan hom geleen en hy het dit verloor

Kaapstad – Taliep Petersen het voor sy dood niks besit nie. ‘n Doodse stilte het in hof 1 van die hooggeregshof hier geheers toe Taliep se weduwee dit gister as deel van haar getuienis aan die hof voorgelê het. Mev. Najwa Petersen, wat gesê het sy het nooit haar man se van aangeneem nie en dat sy  haar nooiensvan (Dirk) behou het, het gister self die getuiebank ingeneem na ‘n stilswye van langer as ‘n jaar. Sy is deur haar regsverteenwoordiger, adv. Johan Engelbrecht, as “me. Dirk” aangespreek. By tye het sy te sag gepraat en moes Engelbrecht aandui dat sy harder moet praat. Sy sal vandag getuig oor presies wat volgens haar op die aand van die moord in die egpaar se dubbelverdiepinghuis in Athlone gebeur het. Die hof het gister uit sy nate gebars terwyl Petersen, geklee in ‘n wit-en-swart uitrusting, vertel het van haar liefdevolle verhouding met Taliep, wat volgens haar “soos enige ander verhouding normaal was”. “Al waaroor ons verskil het, was die kinders. Hy wou ook nie hê dat ek moet rook nie en ek rook wel.” Hulle het ook verskil oor die feit dat sy haar van behou het. Sy het getuig dat sy nie ‘n voorval in April 2006 kan onthou toe sy haar man glo met ‘n mes in die nek gesteek het nie. Hofgangers het hierop hard gemurmureer en moes deur regter Siraj Desai stil gemaak word. Engelbrecht het vrae aan haar gerig oor haar verhouding met mnr. Fahiem Hendricks, die man wat die staat aanvoer die moord op Taliep beplan het. Sy het getuig dat sy drie keer aan hom geld geleen het en hom daarna aanhoudend gebel het om navraag oor die terugbetalings te doen. “Geld is vir my belangrik. Dit is my geld. Ek moes hom treiter.” Petersen het getuig dat sy vier geslypte diamante aan Hendricks gegee het om vir R250000 te verkoop. Hy kon dan R10000 vir hom vat. Kort voor die moord op Taliep het sy hom gedurig gebel om navraag te doen oor die diamante. “Ek het hom baie gebel, want hy sou sê ek moet hom oor 15 terugbel, of daar is nog ‘n oproep wat wag. Ek het begin paniekering raak.” Op ‘n vraag van Engelbrecht waarom sy paniekerig was, het Petersen gesê: “Ek het Fahiem vertrou. Maar nadat ek die diamante oorhandig het, het ek senuweeagtig begin raak. Fahiem het aanhou sê ek moenie bekommerd wees nie, hy het die koper van die diamante vertrou.” Petersen het ontken dat hulle ‘n verhouding gehad het. Sy het ook ontken dat Taliep hul huweliksake met ander mense bespreek het en dat hulle sou skei. Sy het aan die hof gesê hulle is binne gemeenskap van goedere getroud en indien hulle sou skei, sou sy vir hom 50% gee van “wat op my naam is”. Op ‘n vraag van Desai wat presies “op Taliep se naam was”, het sy geantwoord “niks”. Die hof het gehoor dat mev. Petersen maandeliks ‘n salaris van R100000 verdien het as deel van die familie-onderneming, Dirk Fruit. Sy het ook genoem dat sy R4 miljoen aan Taliep gegee het wat hy glo in twee onsuksesvolle transaksies (‘n piramideskema en diamante) verloor het.

Najwa moet uitstaande regskoste nou betaal

Verslaggewer: Carryn-Ann Nel

KAAPSTAD – Mev. Najwa Petersen, die vermeende baasbrein agter die moord op haar man, die musieklegende Taliep Petersen, moet meer as R100000 aan uitstaande regskoste opdok. Regter Anton Veldhuizen het gister in die hooggeregshof hier ‘n bevel toegestaan dat mev. Petersen haar eerste prokureur, mnr. Norman Snitcher, R125022.58 in agterstallige regskoste moet betaal. Snitcher, van die prokureursfirma Snitchers at Law, is die dag van mev. Petersen se inhegtenisneming (18 Junie 2007) as prokureur aangestel. Mev. Petersen het sedertdien van haar tweede regspan (adv. Herbert Raubenheimer SC en mnr. John Riley) verander en maak nou van die dienste van adv. Klaus von Lieres und Wilkau SC en mnr. Reaz Khan gebruik. Luidens hofstukke het mev. Petersen op 12 Julie aan Snitcher instruksies gegee om teen die weiering van borgtog te appelleer. Dit was nadat streeklanddros Robert Henney haar aansoek op die dag geweier het. Luidens hofstukke het Snitcher sy mandaat behoorlik uitgevoer en voorberei. Hy het die advokaat (adv. Craig Webster) instruksies gegee om ‘n datum vir die appel te kry en om argumentshoofde voor te berei. Uitspraak in die appelsaak is op 5 September gelewer. Borgtok is weer geweier. Die regter in die saak, waarnemende regter John Whitehead, het ook verlof tot appel aan die appelhof geweier. Luidens hofstukke het die advokaat (Webster) hierna instruksies ontvang om ‘n petisie by die appelhof in te dien. Volgens Snitcher is sy mandaat op 7 September 2007 beëindig. “(Snitcher) het daarna die regskoste van die advokaat en prokureur voorgelê met betrekking tot die bogemelde dienste soos partye ooreengekom het.” Op 5 Februarie vanjaar het mev. Petersen skriftelik die uitstaande bedrag van R125022.58 aan Snitcher erken. Volgens ‘n faktuur van Webster, wat in hofstukke ingesluit is, sluit die bedrag onder meer die koste van konsultasies by Valkenberg-hospitaal (waar mev. Petersen destyds aangehou is) van vyf uur en 30 minute, in. Sy kantoorwerk het 59 uur en 30 minute geneem en hy moes 798 bladsye deurlees. Sy is op 10 Maart vanjaar gedagvaar. Intussen gaan mev. Petersen en haar mede-beskuldigdes se moord-verhoor Dinsdag in die Kaapse hooggeregshof voort.

Taliep-saak vir twee maande uitgestel, Engelbrecht verseker hof dat hy Najwa se laaste advokaat is

Die Burger

Verslaggewer: Carryn-Ann Nel

KAAPSTAD – Een van die land se voorste strafregadvokate het gister sy gewig agter mev. Najwa Petersen ingegooi en die hof verseker dat hy Petersen se laaste regsverteenwoordiger sal wees.
“Die advokaat van haar keuse is ek. Dit het sy vanoggend duidelik gemaak,” het adv. Johan Engelbrecht SC, van Johannesburg, gister in ‘n stampvol hofsaal aan regter Siraj Desai gese.
Op sy beurt het Desai dit duidelik gestel dat hy geen verdere versoeke van mev. Petersen om van regsverteenwoordiging te verander, sal duld nie.
Engelbrecht is mev. Petersen se vierde advokaat sedert haar inhegtenisneming in Junie verlede jaar. Sy word van die moord op haar musieklegendeman, Taliep, aangekla.
Engelbrecht, ‘n gesiene in regskringe, verteenwoordig ook me. Cezanne Visser (30), ‘n voormalige Pretoriase advokaat. Hy het verlede jaar ook die skoolhoof van ‘n primere skool in Delft wat op ‘n klag van onsedelike aanranding onskuldig bevind is, verteenwoordig.
Adv. Klaus von Lieres und Wilkau SC het Dinsdag sy mandaat beeindig weens ‘n tekort aan geld.
Gister het Engelbrecht die regter die versekering gegee dat hy met mev. Petersen gekonsulteer het. “Sy wil ook klaarmaak met die saak.”
Volgens hom beplan mev. Petersen om tussen ses en agt getuies in haar verweer te laat getuig. Hy moet nog met die mense konsulteer.
“Ek gaan vra dat die saak tot Augustus uitgestel word.”
Hofgangers het op die stelling na hul asem gesnak.
Engelbrecht het gese dit is weens omstandighede en hy vra alle betrokke partye om verskoning.
Adv. Shareen Riley, vir die staat, het gese sy maak beswaar teen so ‘n lang uitstel. “Dit het nou al vir die beskuldigde ‘n patroon geword om (van regspan) te verander.”
Nadat die hof verdaag het vir die regter om te besin, het Desai aan Engelbrecht gevra: “Net een punt wat my pla: Gister het adv. Von Lieres aan ons gese hy onttrek weens ‘n tekort aan finansiele instruksies. Vandag laat die beskuldigde ‘n senior advokaat uit Johannesburg vlieg?”
Engelbrecht het hierop geantwoord dat daar eers laat Dinsdagmiddag “ordentlike” finansiele instruksies ontvang is. “Ek wil nie in detail hierop ingaan nie.”
Desai het gevra of daar ander redes as finansies is, waarop Engelbrecht gese^ het die redes is privilegie.
In sy bevinding oor die aansoek om uitsel het Desai gese “dit gebeur alte dikwels, en veroorsaak ontwrigting op ons hofrolle, en skep ernstige nadele vir die medebeskuldigdes, die families van die slagoffers en natuurlik, die strafregstelsel. Ek aanvaar die argument dat adv. Engelbrecht nie in ‘n posisie is om hom deeglik voor te berei in die drie oorblywende weke van die termyn nie. Om nie die uitstel toe te staan nie, plaas die beskuldigde se reg op ‘n regverdige verhoor in die gedrang.
“Aan die ander kant toets die beskuldigde – deur haar optrede – die hof se toegewings wat aan haar gemaak kan word tot die uiterste.
“Indien daar enige verandering in regsverteenwoordiging is wat die vloei van die hofsaak sal belemmer, sal die beskuldigde haarself moet verteenwoordig en die gevolge daarvan dra.”
Die saak is tot 28 Julie uitgestel.

Najwa sê gou sy is nie betrokke

Die Burger

Verslaggewer: Carryn-Ann Nel

Reuse-polis: Vir Zaynab

Moordkussing ‘weg’

KAAPSTAD – Nog voordat mev. Najwa Petersen deur die polisie as ‘n verdagte beskou is, het sy herhaaldelik onder eed verklaar dat sy niks met haar man se moord te doen gehad het nie. So het die Kaapste hooggeregshof gister gehoor toe die ondersoekbeampte, kapt. Joe Dryden, gister getuig het. In ‘n verklaring wat mev. Petersen twee dae na haar man se moord aan Dryden gemaak het, sê sy daar was geen “kwade gevoeldens” tussen haar en haar man nie, selfs nadat sy hom in April 2006 met ‘n mes gesteek het. Hof 1 was gister, soos gewoonlik volgepak. Mnr. Ngconde Balfour, minister van korrektiewe dienste, en sy adjunk, me. Loretta Jacobus, het in ‘n mediabank in die hof gesit. Regter Siraj Desai het vir Balfour geknipoog toe hy en Jacobus die hof weer verlaat het. Luidens mev. Petersen se verklaring was sy in ‘n “diep slaap” toe sy “wil wakker gemaak is” deur ‘n onbekende man. Sy het verduidelik hoe hulle beroof is terwyl ‘n vuurwapen teen haar kop gehou is. Die aanvallers het haar in haar kamer toegesluit nadat sy vir hulle gewys het waar die kluis is. “Kort daarna het ek een skoot hoor afgaan en daar was ‘n doodse stilte.” Mev. Petersen het luidens die verklaring hierna verskeie familielede gebel. Adv. Shareen Riley, vir die staat, het dit aan Dryden gestel dat mev. Petersen dit twee keer in haar verklaring stel dat sy “niks het om weg te steek nie”. “Het u dit vir haar gevra?” wou Riley by Dryden weet. Dryden het geantwoord dit is wat sy vir hom gesê het en dat hy haar net uitgevra het as hy meer duidelikheid oor kwessies wou kry. In ‘n tweede verklaring wat mev. Petersen op 12 Januarie 2007 afgelê het, skets sy haar verhouding met mnr. Fahiem Hendricks (wat die staat aanvoer sy gevra het om die moord te beplan) as ‘n “telefoonverhouding” weens die baie oproepe. Dryden het ook getuig oor ‘n Liberty Life-polis van Taliep van R5,3 miljoen waarvan die egpaar se dogter Zaynab die begunstigde was. Riley het gevra hoe dit uitbetaal sou word. Volgens Dryden sou dit in mev. Petersen se Namibiese bankrekening inbetaal word. Hy het gesê mev. Petersen was die voog, sodat as die polis uitbetaal is, sy beheer daaroor kon uitoefen. in Maart verlede jaar is dokumentasie voltooi vir ‘n trust vir zaynab. Tydens kruisondervraging het adv. Klaus von Lieres und Wilkau SC, vir mev. petersen, Dryden gevra oor ‘n kussing wat in die moord gebruik is wat nie in die huis gevind kon word nie. “U sal onthou beskuldigde drie (mnr. Waheed Hassen) vertel van ‘n kussing waarin die vuurwapen toegevou is.” Dryden het gesê hy het navrae gedoen, maar kon geen kussing opspoor nie. “Ons het eers ses maande later van die kussing uitgevind,” het hy gesê. Die regter het bygevoeg: “Tensy iemand dit weggesteek het.” Die advokaat het dit ook aan Dryden gestel dat die skoot afgegaan het terwyl mev. Petersen ‘n familielid gebel het. “U het haar getreiter van dag een af.” Dryden het dit ontken en gesê hy is steeds respekvol teenoor haar.